Сөекле кызым!
Кичә сиңа тәгаһһедле итеп тәрҗемәи хәлемне күндергән идем. Ул Хөсәен Намукъ өчендер. Вакытың булса, үзең дә укып чыгарсың. Әсәрләрем хакында башкасы мәгълүмат биргән тарызда язылды. Синең мәктүбеңне дә кичә генә алдым. Хасталыгың хушыма китмәде. Синең ул чуаннар йорулган вакытда чыгалар булырга охшый. Йәмәгеңдә, бәлки, берәр матдә ноксандыр , иншаллаһ, Аурупада бөтен хасталыкларны бетереп килерсең. Дөвиз мәсьәләсе ул кадәр авыр түгел. Сине махсус куркыталар. Тагы син аларга ышанып торма. Формаль кыйсемен алар эшләгәч дә, үзең тәхкыйк ит , кешеләр куш. Гыймад әфәндедән эш чыкмас дип уйлыйм. Аларда ул эшләр бик сыкы булырга тиеш, чыкса, Хаккый бәйдән бернәрсә чыгар. Аңарга мәктүб язып кара. Минемчә дә, дөвиз эшеңне андан тәмамлап килү лязем. Монда бер килгәч, китеп йөрмәссең. Мондан Вахид бәй берлә Наилә1 дә Франсәгә китәргә уграшалар . Наиләнең колагын төзәтдерү фикерендәләр. Алар хазиранның 18 ендәге вапур берлә китәргә уйлыйлар. Син дә бит вапур берлә китү тарафындасыңдыр. Тайярә сине бик йорыр. Вапурда һәм истирахәт итәрсең һәм сәяхәт. Италияне дә күргән булырсың. Вахид бәй дөвиз авырлыгындан бер дә бәхәс итмәде. Акча табу авырлыгындан гына бәхәс итде.
Миндә яңа бернәрсә дә юк. Һавалар бераз йылынды, әмма көндә кебек ягъмур явып тора. Муса әфәнде хастаханәдән чыкды булырга кирәк. Шактый тупланды .
Тәрҗемә бюросына игадәле , тәгаһһедле күндергән идем. Игадә мәкъбузы килеп чыкды, димәк, тәрҗемә үрнәген алдылар. Уны бер тикшертерсең. Камал Локман бәйнең Анкарада булынып-булмавын телефон берлә белешә алып, хәбәр бирсәң, яхшы булыр иде. Уның мөәссәсәсендә дә, өендә дә телефон бар (нумирасы – 71.85), әүвәлле, галиба, 71 не шалтыратасың. Башка хәбәрләр юк. Һәммәмез сау-сәламәт. Хуш, кызым.
Әтиең Мөхәммәдгаяз
19 май, 1948. Бәйуглы.
Искәртмәләр һәм аңлатмалар:
112. Сәгадәт Чагатайга. Хат ТР МАда (2461 ф., 1 тасв., 6 эш) саклана. Автограф гарәп язуында. Текст шуннан алынды. Беренче тапкыр басыла.
1 Вахид бәй берлә Наилә – Садри Максудиның кече кызы һәм аның ире Вахид Турхан.
Парис – Парижда.
Мәгърузә – доклад.
Вәхаләнки – чынлыкта.
Изахат – аңлатма.
Тарызда – үрнәктә.
Йорулган вакытта – арыган вакытта.
Ноксандыр – җитешсездер.
Тәхкыйк ит – дөреслеген тикшер.
Сыкы – кырыс, каты, көчле.
Уграшалар – маташалар.
Хазиранның – июнь аеның.
Вапур – пароход.
Тайярә – самолёт.
Истирахәт итәрсең – ял итәрсең.
Тупланды – сәламәтләнде.
Игадәле – кире кайтарулы.
Мәкъбузы – квитанциясе.
Мөәссәсәсендә – оешмасында.
Чыганак: Исхакый Г. Әсәрләр. 14 том. – Казан:
Татарстан китап нәшрияты, 2013.