Сөекле кызым!
Ләбибдән китапларны алуың хакында элекдә мәктүбеңне алган булсам да, Ләбиб берлә хат көткәнгә җавап язмаган идем. Кичә Ләбиб мәктүбеңне тапшырды. Ни язганың мәгълүм улды. Минемчә, шулай хәрәкәт итү мөнасиб булыр. Син юлга хәзерләнгәндә, Анкарадагы инглизләрнең культур мөәссәсәләрен иһмаль итмә. Алардан берәр тәүсыя алсаң, эшеңә ярар. Вә башка инглиз гыйлем әһле берлә танышлыгың булса, алардан да тәүсыя-фәлән ал. Аурупа халкы бит язган кәгазьгә генә ышана. Бу хосусда инглизе дә алмандан фарикълы түгел. Ләбиб барганда бик хаста булган икәнлегене аңлатды. Инде үтеп киткәндер. Иншаллаһ. Син мәүсиме килде дип, бик күп салат ашый торгансыңдыр. Һәрнәрсәнең фазласе зарарлы булган кебек, витаминлы печәнләрнең дә күбесе зарарлы. Вә һәртөрле чуанларның күбесе кайбер витаминның һазыйм ителмәвендән килә икән. Докторлар шулай ди. Кайвакыт килүең хакында, дөвизыңның күпме бирелүе хакында язарсың һәм дә минем тәрҗемә китабымны да хәтереңдән чыгарма. Ул эшне син юлга салып китә алмасаң, мин башкара алмам.
Зөһрә Финляндиядән юллык акча көтә иде. Кичә мәктүб алган. Дөвиз чыгарырга рөхсәт бирмәделәр, акча күндерә алмыйм, дигән. Һәр йирдә дә хәзер дөвиз бәласе бар. Зөһрә дә апдырап калган.
Монда сәламәтлек. Садри тәмамән савыкды. Муса әфәнде тагы хәлсезләнгән. Зәки Вәлидидә утырганга, барып күрә алганым юк. Мәрьям ханымның әнисе Әсма ханым хасталанды. Затүррә була башлаган иде. Пенициллин берлә туктатдылар. Әле һаман ятакда. Аларда берәр айдан бирле Сафия ханым кунакта. Юнанстандан ире Фәйзи бәй кайтканын көтеп тора. Аларның кызлары да (тугыз-ун яшьлек) затүррә ала башлаган иде. Пенициллин берлә коткарып калдылар.
Хәсән, имтиханларга хәзерләнәм, дип ята. Аллаһ муаффәкъ итсен. Үзем искесе кебек, кайвакыт берничә көн мигъдәм авыртмый, кайвакыт көнләр буе авырта. Хәзер яңа бер кәшеф тапдым. Мигъдә авыртуым кабз берлә баглы икән. Кабз булмаса, рәхәт итәм. Хуш, кызым.
Әтиең Мөхәммәдгаяз
Вахид бәй берлә Наилә вапурның туристик классында Марсельга1 кадәр икешәр йөз лирага билет алдылар. 18 ендә китәчәкләр. Хуш.
3 июнь, 1948. Бәйуглы.
Искәртмәләр һәм аңлатмалар:
114. Сәгадәт Чагатайга. Хат ТР МАда (2461 ф., 1 тасв., 6 эш) саклана. Автограф гарәп язуында. Текст шуннан алынды. Беренче тапкыр басыла.
1 Марсель – Франциядәге шәһәр һәм эре елга порты.
Фарикълы – аермалы.
Мәүсиме – сезоны.
Һазыйм ителмәвендән – эшкәртелмәвеннән.
Затүррә – пневмония.
Юнанстандан – Грециядән.
Муаффәкъ – уңышлы.
Кәшеф – ачыш.
Кабз – эч кату.
Чыганак: Исхакый Г. Әсәрләр. 14 том. – Казан:
Татарстан китап нәшрияты, 2013.