Сөекле кызым!
Хастаханәдән чыккач да, сиңа тәфсилле хат язган идем. Уны инде күпдән алып, минем әхвалемә вакыйф улгансыңдыр . Менә инде бер атна үз өемдә утырам. Хасталыгым тәмамән бетмәсә дә, Аллага шөкер, шактый хәфифләде . Кай көнләрне бөтен көн һичбер авыртмаенча үтеп китә. Үзем дә хасталыкны идарәгә өйрәнеп киләм. Бөтен мәсьәлә нинди ашның дукыну-дукынмавын белүдәдер. Ләкин хасталыгым капризлы. Бер мәртәбәсендә һичбер дукынмаган аш икенчесендә дукына. Шулай өйрәнә-өйрәнә, иншаллаһ, хасталык берлә […] итәрме. Чыккач да локантада ашаштырдым. Ике көндән бирле өйдә аш пешереп маташам. Кайсысы тагы яхшырак булачагын әле кәстирәмәдем . Иртәгә «Истанбул» вапуры берлә безнең Мөхәммәд әфәнде киләдер. Вә безнең һәмшәһриләрдән дә бик күп кеше киләчәк, диләр. Бакалым, кемләр килеп чыгар.
Синең кайтуың кайвакыт? Кичә Фәйзи бәйнең1 борадәре Нури Тугай бәйләргә киткән идем. Ул бит дәүләт диңгез юлларында хезмәт итә, ябанҗы сәфәрләр сервисында мәэмүр . Унардан «Истанбул» вапурының Марсильяга2 сәфәрләрен үгрәндем. Киләчәк сәфәре Истанбулдан 4 шөбатда калкачак, 9 шөбатда Марсильяда улыначак. Марсильяда ике көн калып, 11 шөбатда Марсильядан калкып (сәгать 18 дә), 17 шөбат өйләдән соң сәгать 2.30 да Истанбулга килеп җитәчәк. Туристлык классда (Вахид бәй берлә Наилә килгән класс) дүрт кешелек даирәсендә ашау-эчү берлә 378 лира. Гомуми даирәдә – ун-унике кешелек даирәдә 352 лирадыр. Икенче мәүкыйгда буш урынлар һәрвакыт булына икән дә, таныш-белешкә анда да күчерәләр икән. Вахидлар аерым даирәдә килгәнләр. Нури бәй шундый ярдәм өчен вапурның каптаны Шәкри бәйгә минем исемемдән (ягъни ябанҗы сервислар мәэмүре Нури Тугай бәйнең әкърибасы дип) мөрәҗәгать итсә, ярдәм дә улыныр, диде. Боларны сиңа мәгълүмат өчен генә язам. Бәлки, син әле һаман тайярә берлә дөнү тарафындасыңдыр. Вапурга билет парасын мондан да түләп була икән. Бу хосусда карарыңны биреп, Таһирга язарсың, миңа да белдерерсең.
Фатыйма Ялчиндан Каһирәдән мәктүп килеп чыккан. Муса әфәндене Каһирәгә килер-килмәз, хастаханәгә йирләшдергәнләр, хасталыгы әндишәледер, дигән. Хәерле булсын. Монда яңа хәбәрләр юк. Синдән мәктүп көтеп ятам. Монда һавалар шактый сыйсыз китә. Анкара бик суык, диләр. Истанбул ул кадәр түгел, әмма ягъмурлы-карлы, мин һәрвакыт собамны ягып торам. Хуш, кызым.
Әтиең Мөхәммәдгаяз
26 гыйнвар, 1949. Бәйуглы.
Ничек кайтуда, әлбәттә, карар сиңа гаиддер . […]
Хәзер генә 21 нче тарихлы мәктүбеңне алдым. Сау-сәламәтмен.
Искәртмәләр һәм аңлатмалар:
144. Сәгадәт Чагатайга. Хат ТР МАда (2461 ф., 1 тасв., 6 эш) саклана. Автограф гарәп язуында. Текст шуннан алынды. Беренче тапкыр басыла.
1 Фәйзи – Мөхәррәм Фәйзи Тугай.
2 Марсилья – Марсель шәһәре.
Әхвәлемә вакыйф улгансыңдыр – хәлемне белгәнсеңдер.
Хәфифләде – җиңеләйде.
Дукыну-дукынмавын – тәэсир итү-итмәвен.
Кәстирәмәдем – аныкламадым.
Борадәре – иптәше; ир туганы.
Ябанҗы сәфәрләр – чит ил сәфәре.
Мәэмүр – чиновник.
Шөбатда – февральдә.
Мәүкыйгда – урында.
Каптаны – капитаны.
Әкърибасы – туганы.
Тайярә – самолёт.
Собамны – мичемне.
Гаиддер – бәйледер.