Сөекле кызым!
Синең 21/1 тарихлы мәктүбеңне алдым. Шул көнне сиңа вапур сәфәрләре хакында мәгълүматлы озын бер мәктүб күндермешдем. Бу хатыңда синең тагы әле анда калырга теләвеңне, мәэзүнеңне узатдырырга йөрүеңне аңладым. Бу хәбәр һич дә хушыма гитмәде. Әгәр узатачак улсалар, бу хәл сиңа каршы мең бер төрле интрига ясауга сәбәп булачакдыр. Икенчедән, синең хакыңда вазифа шөнасы , дигән, эшләнгән фикерне бозачак вә мохитеңдә хөрмәтеңне төшерәчәкдер. Өченчедән, мәсләгендән сине узаклаштырачак таләбәләреңне анда-монда таратачакдыр. Боларның һәммәсе авырлык берлә еллар буе тырышып-тырмашып, әлдә иткән хак мәсләгең гаиб улмасына сәбәп улачакдыр. Шуларга каршы, анда тагы алты ай, тугыз ай калсаң, кала белсәң, әлдә ни әдинәчәксең ? Алманчаның яһүди жаргонын өйрәнәчәксең. Вә берничә яһүдине симертәчәксең. Бу кадәр зәхмәтлә әлдә мәүкыйгыңны, хөрмәтеңне шул юк нәрсәләр каршылыгына фида итү язык улмаячакмы? Мин синең бу тәшәббесеңне һичбер төрле аңламадым. Үзләренә каршы шундый мөсамәхәләрне кабул итсәләр дә, безгә бунларның һичберсен гафу итмәячәкләрдер. Бу хосусда синең дуст дип йөргәнләреңнең хәрәкәте, сиңа ачыкдан вәсәнилекдән дошманларың берлә вәсәнең […] улачакдыр. Иншаллаһ, шул мәэзүнеңне бирмәсәләр дә, син дә мәүкыйгың вә хөрмәтеңне куртарырсың . Юк исә мөхәкъкак уларак үзеңнең […] улачак хәрәкәтләрдә вәсилә бирмеш улачаксың!
Миндә саулык-сәламәтлек. Мигъдә авыруым мөзминлеген гаиб итде . Шимди сыкы пәрһиз ясап торам. Мөмкин кадәр аз хәрәкәт итәргә тырышам вә бик аз йөрим. Суыклар мәүсиме булганга, простатым бераз фазла рәхәтсез итә. Әмма тәхәммел итмәслек түгел. Ул хакда докторлар, шимдилек гамәлиятә ихтыяҗ юк, диделәр. Мөхәммәд әфәнде хатыны берлә килеп чыкды. Әле алар Тузлада. Мин күрә алганым юк. Берничә көндән килеп чыгарлар. Яңа хәбәрләр юк. Истанбулда фазла суык булмаса да, һавалар бик карлы-яңгырлы, чамурлы кичәдер. Әлегә хуш, кызым.
Әтиең Мөхәммәдгаяз
29 гыйнвар, 1949. Бәйуглы.
Искәртмәләр һәм аңлатмалар:
145. Сәгадәт Чагатайга. Хат ТР МАда (2461 ф., 1 тасв., 6 эш) саклана. Автограф гарәп язуында. Текст шуннан алынды. Беренче тапкыр басыла.
Мәэзүнеңне узатдырырга – хокукыңны озайтырга.
Шөнасы – остасы.
Әлдә – кулда.
Әлдә ни әдинәчәксең – нәрсәгә ия булачаксың.
Фида итү – корбан итү.
Тәшәббессеңне – инициативаңны.
Мөсамәхәләрне – ташламаларны.
Вәсәнилекдән – йокымсыраудан, оюдан.
Куртарырсың – коткарырсың.
Мөзминлеген гаиб итде – хроник төсен югалтты.
Сыкы – каты.
Мәүсиме – сезоны.
Тәхәммел итмәслек – чыдамаслык.
Чамурлы – пычрак.